في هذا الدرس نتعرف على تكنيك آخر لاستخراج الأصوات و زيادتها في العزف على الطبلة. ينصح ناصر الطالب/الطالبة أن لا يتقدم للدرس التالي إلا بعد إتقان تدريبات هذا الدرس و الأخذ بالنصائح الواردة فيه.
ناصر سلامة:
"مرحبا أنا ناصر سلامة من إعزف دوت كوم واليوم إحنا بالحصة رقم تلاتة وعشرين.
الحصة رقم تلاتة وعشرين بتحكي عن أساسيات فصل الحواس في آلة الطبلة، شو يعني فصل الحواس في آلة الطبلة؟
فصل الحواس في آلة الطبلة يعني أنه تكون الإيد اليمين بتعزف على سبيل المثال إيقاع أو وزن أو بيت والإيد الشمال بتعزف إشي تاني إله علاقة أو ما إله علاقة في الإشي اللي بنعزف اليوم رح نحي عن أساسيات ورح نحكي عن أشياء مربوطة في بعض يعني اليوم رح نحكي مثلاً عن إيقاع أربع أرباع أو أربعة على أربعة أو وزنه أربعة على أربعة زي ما شرحنا بالحصص الماضية زي إيقاع المقسوم وكيف الإيد التانية ممكن تعمل تشكيلات أو زخارف على هدا الإيقاع علماً أنه الإيد الأولى بتكون ماسكة الريذم أو ماسكة البيت.
مثال بسيط الإيد اليمين ماسكة إيقاع المقسوم (يعزف الأستاذ ناصر التمرين على الطبلة) الحركة الطبيعية للإيد حسب ما تعلمنا أو حسب ما مشينا في الدروس الماضية أنه (يعزف الأستاذ ناصر التمرين على الطبلة) دور الإيد اليمين هو مُكمّل عشان ناخد شكل الإيقاع دور الإيد الشمال عفواً مُكمّل عشان ناخد الإيقاع بشكل كامل وناخده بشكل طبيعي لكن إذا صارت الإيد الشمال تلعب بعيداً عن مكانها الطبيعي اللي هو الفراغات اللي موجودة أو الريستات أو الإسات بصير شكل الإيقاع كالتالي (يعزف الأستاذ ناصر التمرين على الطبلة).
كل ما زاد تكنيكنا كل ما زادت التقنيات اللي إحنا وتمارينا على إيدنا الشمال بصير عنا قدرات بتساعدنا أكتر لأنه إحنا نحط زخارف في هذا النوع من العزف هدا النوع من فصل الحواس (يعزف الأستاذ ناصر التمرين على الطبلة) رح يصير الكل أو البعض منكم يعتقد أنه أنا بستعمل إيدي اليمين في إني أزيد أصوات وأساعد الإيد الشمال إنها تلعب زخارف.
هلأ رح أستعمل آلة تانية صوتها مختلف تماماً عن صوت الطبلة عشان يبيّن معانا إيش هي الأصوات اللي طالعة من صوت الطبلة وإيش هي الأصوات اللي طالعة من آلة الطار.
رح نبدا بإيقاع المقسوم هاي المرة رح نعزف على الطار إيقاع المقسوم والإيد الشمال عم تلعب إشي مختلف تماماً عن المتوقع من الإيد الشمال أو دور الإيد الشمال اللي تعلمناه في إيقاع المقسوم (يعزف الأستاذ ناصر التمرين على الطبلة).
منشوفكم بالحصة الجاي في إعزف دوت كوم."
